Қазақ тілі мен әдебиеті пәнінен Қанипа Бітібаева атындағы III Республикалық олимпиада

2024 жылғы 11-12 желтоқсан күндері КСРО халық ағарту ісінің үздігі, Қазақстан Республикасының еңбек сіңірген мұғалімі Қанипа Бітібаева атындағы ІІІ Республикалық олимпиадасы және КСРО халық ағарту ісінің үздігі, Қазақстан Республикасының еңбек сіңірген мұғалімі Асқар Ислямов атындағы оқытушылар арасында «Үздік педагогикалық эссе» ІІ Республикалық байқауы Абай атындағы Шығыс Қазақстан гуманитарлық колледжі базасында өтті.

Студенттер олимпиадасы екі кезеңнен тұрды:

1. Жазбаша – студенттер эссе жазу арқылы өз білімдерін көрсетті.

2. Ауызша – бұл кезеңде Қанипа Бітібаеваның өмірбаяны, ғылыми мұрасы, публицистикалық еңбектері және қазақ әдебиеті пәнінен бағдарламалық білімдер сарапқа салынды.

Оқытушылар арасындағы «Үздік педагогикалық эссе» байқауында педагогтер «Ұлттық білім беру моделі менің көзқарасыммен» тақырыбында эссе жазып, өз педагогикалық идеяларын ортаға салды.

Олимпиаданың қорытындысы бойынша жеңімпаздар мен олардың жетекшілері Қазақстан Республикасының Оқу-ағарту министрлігінің грамоталарымен, дипломдарымен, алғыс хаттарымен және сертификаттарымен марапатталды. Сондай-ақ, студент жеңімпаздарға колледждің Бұқтырма су қоймасы жағалауында орналасқан оқу-өндірістік базасында өтетін «Жас көшбасшылар» жазғы мектебіне жолдама берілді.

«Үздік педагогикалық эссе» байқауында жеңімпаз атанған педагогтер Қазақстан Республикасының Оқу-ағарту министрлігінің І, ІІ, ІІІ дәрежелі дипломдары мен сертификаттарына ие болды. Бұған қоса, Ислямовтар әулетінің демеушілігімен қаржылай сертификаттар тапсырылды.