Қазақ тілі мен әдебиетінен Қ. Бітібаева атындағы III Республикалық олимпиада және Асқар Ислямов атындағы «Үздік педагогикалық эссе» II Республикалық байқауының ашылу салтанаты

2024 жылғы 11 желтоқсан күні Шығыс Қазақстан облыстық драма және оперетта театрында дәуірдің дара ұстазы, КСРО халық ағарту ісінің үздігі, Қазақстан Республикасының еңбек сіңірген мұғалімі Қанипа Бітібаева атындағы ІІІ Республикалық олимпиаданың және КСРО халық ағарту ісінің үздігі, Қазақстан Республикасының еңбек сіңірген мұғалімі Асқар Ислямов атындағы оқытушылар арасында «Үздік педагогикалық эссе» ІІ Республикалық байқауының салтанатты ашылу рәсімі болды.

Іс-шараға Шығыс Қазақстан облысының білім басқармасы басшысының орынбасары Ақылбек Алима, техникалық және кәсіптік білім беру ұйымдарының басшылары мен өкілдері, педагогтер және студенттер қатысты. Ашылу салтанатында Алима Ақылбекқызы өз сөзінде бұл шараның жыл сайын дәстүрлі түрде ұйымдастырылып келе жатқандығын және еліміздің педагогикалық қауымдастығы үшін оның маңызы зор екенін атап өтті. Сондай-ақ  Қанипа Омарғалиқызы мен Асқар Жұмағұлұлының өмірлік тәжірибесі мен педагогикалық мұрасының маңыздылығын ерекше атап өтті. Ұлы тұлғалардың болашақ ұрпақты оқытып, тәрбиелеуде қосқан үлестерін айтып жеткізу мүмкін емес. Осындай шаралар жас педагогтер мен студенттерге үлкен шабыт беріп, олар үшін кәсіби даму жолында жаңа серпін болатынын айтып, сөз соңында Қазақстанның түкпір-түкпірінен келген қатысушыларға сәттілік тіледі.

Шара барысында айтулы тұлғалардың ұрпақтары мен туған-туыстары сахна төріне шығып, қатысушыларға өз лебіздерін білдірді. Барлық қатысушылар мен қонақтар үшін халықаралық, республикалық конкурстардың лауреаттары – талантты жастар өз өнерлерін көрсетті.