«WorldSkills Kazakhstan 2024» чемпионатының жеңімпаздары мен жүлдегерлерін марапаттау салтанаты
2024 жылғы 28 қарашада ШҚО білім басқармасы Өскемен жоғары политехникалық колледжінің базасында «WorldSkills Kazakhstan 2024» IX республикалық кәсіби шеберлік чемпионатының жеңімпаздары мен жүлдегерлерін марапаттау салтанатын өткізді.
2024 жылы қараша айында Астана қаласында өткен жұмысшы мамандықтарының «WorldSkills Kazakhstan-2024» ұлттық чемпионатына еліміздің 555 студенті қатысып, сынға түсті. Соның ішінде Шығыс Қазақстан командасында 27 құзыреттілік бойынша 29 студент қатысты.
Республикалық чемпионат – өз қабілеттерін танытуға және кәсіби шеберлігін көрсетуге тамаша мүмкіндік. WorldSkills Kazakhstan бүкіл әлемге жұмысшы мамандықтарды танымал ету, олардың мәртебесін көтеру және кәсіптік білім беру саласына жоғары стандарттарды енгізу мақсатында өткізіледі.
Білім басқармасының басшысы Чернышёва Инесса Александровна өз сөзінде: «Мемлекет басшысы Қасым-Жомарт Кемелұлы Тоқаев келер жылды «Жұмысшы мамандықтар жылы» деп жариялады. Қазіргі таңда жұмысшы біліктілігі мүлде басқа мамандық, бұл білімі мол, заманауи техникада жұмыс істей алатын мықты маман екенін түсінеміз. Сіздер еңбекті жақсы көретін, өз істеріңізді сүйетін тәжірибелі мамансыздар. Әрине бұл күн сайын сіздерге теориялық білімді беріп қана қоймай, сонымен қатар Worldskills чемпионатында кәсіби дағдыларыңызды іс жүзінде көрсете білуге үйреткен тәлімгерлеріңіздің де еңбегі. Кез келген жеңіс ұжымдық жұмыстың жемісі. Ұжым үйлесімді жұмыс істесе, мақсат айқын болса, сонда ғана бірлескен жұмыстың нәтижесі болады. Ал бүгінгі нәтиже келешек жеңістің бастамасы болатынына сенімдіміз» - деп атап өтті.
«Электроника» құзыреттілігі бойынша жеңімпаз Ростислав Орлов: «Мен WorldSkills Kazakhstan 2024 республикалық чемпионатында облысымыздың атынан «Электроника» құзыреттілігі бойынша қатыстым. Бір жылға жуық уақыт бойы чемпионатқа дайындалдым. Дайындық қиын болғанымен, қызықты болды, әрі менің дамуыма көптеген мүмкіндіктер берді. Астанада сайыс кезінде мықты 18 қарсыласпен бәсекелесуіме тура келді. Тапсырмалар да күрделі болды. Дегенмен, барлық қиындықтарға қарамастан, қарсыластарымды артқа тастап, бірінші орынды иелендім» - деп айтты.
Облысымыздың 9 студенті жүлделі орындарға ие болды. Олар: «Электроника» және «Инженерлік графика CAD» құзыреттіліктері бойынша 2 алтын медаль, «Мехатроника» құзыреті бойынша 1 күміс медаль, «Веб-технологиялар» және «Электрмонтаждау жұмыстары» құзыреттері бойынша 2 қола медаль, сондай-ақ орташа баллдан жоғары көрсеткіштері үшін «Аспаз ісі», «Сән технологиясы», «Сантехника және жылыту» құзыреттері бойынша 3 үздік медальоны.
Өскемен жоғары политехникалық колледжінің «Электроника», «Инженерлік графика CAD» құзыреттіліктері бойынша жеңімпаздары келесі жылы Данияда өтетін EuroSkills чемпионатына қатысу үшін ұлттық құрамаға кіру мүмкіндігіне ие болды.
Шара барысында білім басқармасының басшысы Чернышёва Инесса Александровна жеңімпаздар мен жүлдегерлерге бағалы сыйлықтар табыс етіп, чемпионаттың барлық қатысушыларына және олардың тәлімгерлеріне алғысын білдіріп, алдағы уақытта кәсіби табыс, мықты рух және шығармашылық шабыт тіледі.
